Kaiser Karl V. bestätigt die Gründung der Universität Marburg, 16. Juli 1541
[Transskription]
Wir Carl der Fünffte, von gots gnaden, Römischer Kayser, zu allenn tzeitenMerer des Reichs, in Germanien, zu Hispanien, baider Sicillien, Hierusalem, Hungern, Dalmatien, Croatien etc. Khunig, Ertzhertzog zu Osterreich, Hertzog zu Burgund etc., Graue zu Habspurg, Flanndern vnd Tirol etc. Bekennen öffentlichen mit disem Brief, vnd thuen kundt allermennigelich. — Als vns der hochgeborn Philips Lanndlgraf zu Hessen, vnnser lieber Oheim und Fürst vnndertheniglichen firbringen lassen, wie sein Lieb verschiner Jar gemainem Nutz der Jugent, auch dem Studio zu gutem, in seiner Stat Marpurg ain Vniuersitet vnd hohe Schuel aufrichten lassen, mit vnnderthenigister Bit, das wir, als Römischer Kaiser, Ime dieselbigen gnedigist zu confirmiren vnd zu bestetten, auch sie mit den privilegien, begnadungen vnd Freyhaiten, damit anndere vniuersiteten im heiligen Reiche versehen weren, zu begaben gnedigist geruheten. Darauf haben wir angesehen solich seiner lieb vnnderthenig zimelich Bitt, vnd darumb mit wolbedachtem muet, guetem Rath vnd rechtem Wissen, die obgedacht seiner lieb aufgericht vniuersitet vnd hohe Schuel zu Marpurg gnedigist confirmiert, und bestett, sie auch mit den Freyhaiten, Priuilegien vnd Gnaden, so wie obgemelt, anndere vniuersiteten vnd hohe Schuelen im heiligen Reiche haben, vnd am fürstendigistem begnadet und gefreyet. Thun das auch hiemit aus Römischer Kayserlicher macht wissentlich in Crafft dieses Briefes, also das sie allenthalben fir eine vniuersitet vnd hohe Schuel gehalten vnd geert werden, vnd sie alle Ehre, Wirde, vortail, Recht, Gerechtigkait vnd Gewonhait, wie anndere haben, vnd sich deren freyen, gebrauchen und gemessen sollen und mögen, von allermenniglich vnuerhindert, doch vns vnd dem heiligen Reiche an vnser Oberkait vnd sonst anndern an iren rechten vnd gerechtigkaiten vnuergriffen vnd vnschedlich. Vnd gebieten darauf allen vnd yeglichen Churfirsten, Fürsten, geistlichen vnd weltlichen Prelaten, Grauen, Freyen, Herrn, Rittern, Knechten, Haubtleuten, Landvögten, Vitzdomben, Vögten, Pflegern, Verwesern, Ambtleuten, Schuldthaissen, Bürgermaistern, Richtern, Rethen, Burgern, Gemainden vnd sonst allen anndern vnnsern vnd des Reichs vnderthanen vnd getrewen, vnd firnemblich allen anndern vniuersiteten im heyligen Reiche, auch vnsern Erblichen Fürstenthumben vnd Lannden, das sie die obgedachte vniuersitet zu Marpurg bey dieser unser Kayserlichen Confirmation, Begnadung und Freyheit gentzlichen beleihen, sie deren ruhiglich gebrauchen vnd geniessen lassen, vnd dawider nit bekuemern noch beschweren, noch das andern zu thuen gestatten in kein Weise, als lieb ainem yeden sey vnser vnd des Reichs schwere vngnad vnd Straff, vnd darzu ain Peen nemblich zwanzig Markg löttigs Goldts zu uermeyden, die ain yeder, so offt er freuentlich hiewieder thete, vns halb in vnser vnd des Reichs Camer, vnd den andern halben Thail gedachter vniuersitet zu Marpurg vnablöslich zu betzallen, verfallen sein solle. Mit vrkundt dieses Briefs, besigelt mit vnserm Kayserlichen anhangenden Insigel, geben in vnser vnd des Reichs Stat Regenspurg am 16. Tag des Monats Julii, nach Christi vnsers lieben Herrn gepurdt funfzehen hundert vnd im ain vnd vierzigsten, vnsers Kayserthumbs im ain und zwanzigsten vnd vnserer Reiche im sechs und zwanzigsten Jaren.
HStAM Abt. I Urkunden, Dep. Universität Marburg, 1541, Juli 16, Regensburg. Transskription nach: Urkundensammlung über die Verfassung und Verwaltung der Universität unter Philipp dem Grossmüthigen, hg. von Bruno HILDEBRAND, Marburg 1848, S. 37 f. Hier zit. nach Roderich Schmidt, Die kaiserliche Bestätigung derMarburger Universitätsgründung von 1527 durch Karl V. 1541, in: ZHG 108, 2003, S. 93-94
Abbildung des kaiserlichen Privilegs vom 16. Juli 1541>
rn
Anfragen zu Reproduktionen in hoher Auflösung und druckfähige Vorlagen erhalten Sie von der unter Bestand/Sign. genannten Einrichtung.